Putin butun Rossiya “front uchun” ishlashini talab qildi va bu holat Ikkinchi jahon urushi davrida bo‘lgani kabi bo‘lishi kerakligini aytdi

Rossiya prezidenti Vladimir Putin o‘zining Ukrainaga qarshi boshlagan harbiy hujumi muvaffaqiyati uchun barcha rossiyaliklar front uchun ishlashini talab qildi hamda yana bir bor bu urushni SSSRning 1941–1945 yillardagi nasistlar Germaniyasiga qarshi mudofaa urushiga qiyosladi.

"Ulug‘ Vatan urushi davrida butun mamlakat front uchun, askarlarimiz uchun, himoyachilarimiz uchun ishlagan. Ammo faqat tanklar, samolyotlar, to‘plar va snaryadlargina ishlab chiqarilmagan", — dedi prezident Moskvada o‘tkazilgan “Kichik vatan — Rossiya kuchi” forumida.

Putinning so‘zlariga ko‘ra, “bolalar, buvilar, ayollar paypoq to‘qigan, frontga posilkalar va sovg‘alar yuborgan”.