Portugaliyaning Yevro-2016'dagi g‘alabasiga juda katta hissa qo‘shgan darvozabon faoliyatini yakunlaganini e’lon qildi

Portugaliya terma jamoasining sobiq darvozaboni Rui Patrisiu 37 yoshida faoliyatini yakunladi.

Bu haqda Portugaliya futbol federasiyasi ma’lum qildi. Xayrlashuv marosimi 12 dekabr kuni bo‘lib o‘tadi.

Patrisiu "Sporting" tarbiyalanuvchisi. U 2006 yildan 2018 yilgacha Lissabonning kattalar jamoasida o‘ynagan, shundan so‘ng "Vulverxempton"ga o‘tgan. 2021 yildan 2024 yilgacha darvozabon "Roma"da o‘ynagan. Keyinchalik u "Atalanta"ga o‘tdi va uning so‘nggi klubi BAAning "Al-Ayn" klubi edi.

Portugaliya terma jamoasi safida Rui 108 ta o‘yin o‘tkazib, 2016 yilda Yevropa chempionati va 2019 yilda Millatlar ligasida g‘olib chiqqan. "Roma" bilan u 2021/22 yilgi mavsumda Konferensiyalar ligasi g‘olibi bo‘ldi.

"Sporting" tarkibida Patrisiu uch martadan Portugaliya kubogi va Superkubogini qo‘lga kiritgan, shuningdek, Portugaliya Liga kubogi sohibiga aylangan.