Parij teatri binolarini qochqinlar egallab olgani sababli yopilish arafasida

Parijdagi La Gaîté Lyrique teatri 300 ga yaqin muhojirlar guruhi binosini egallab olganidan so‘ng bankrot bo‘lish arafasida. Hammasi 10 dekabr kuni teatr “Fransiyada qochqinlarni qabul qilish masalasini qayta ko‘rib chiqish” deb nomlangan tadbir o‘tkazgach, migrantlarni tekinga taklif qilganidan boshlandi. Endi, deyarli olti hafta o‘tgach, qochqinlar binoda qolib, teatr faoliyatini to‘sib qo‘yishmoqda.

Shu munosabat bilan barcha spektakllarni keyinga qoldirish, bekor qilish yoki boshqa teatrlarda o‘tkazish kerak edi. Bu yuz minglab yevrolik moliyaviy yo‘qotishlarga olib keldi. Ma’muriyat ta’kidlaganidek, teatrning atigi 30 foizi davlat tomonidan moliyalashtiriladi, qolgan 70 foizini esa mustaqil ravishda ishlab chiqishi kerak.

“Binoning egallab olingani hamda Parij va prefektura ma’muriyati tomonidan yechim topilmagani sababli, La Gaîté Lyrique endi tomoshabinlarni sig‘dira olmaydi”, deyiladi teatr saytidagi bayonotda.

Binoda qolgan muhojirlar stul va stollarda uxlashadi, ovoz yozish studiyasi esa tibbiyot markaziga aylantirilgan. Teatr ma’muriyati binodagi sanitariya sharoiti tez yomonlashayotganini ma’lum qildi.

Teatr binolarini egallab olgan qochqinlar “munosib va ​​doimiy uy-joy” talab qilmoqda. Teatr rahbariyati binoning egallab olinishi ular uchun “to‘satdan va halokatli zarba” bo‘lganini ta’kidlab, shahar va davlat idoralaridan tezkor yordamga umid qilmoqda.