Moskva AQShga ishonmaydi: Yaxshilikka umid, yomonlikka tayyorgarlik

Moskva AQSh bilan munosabatlarda "ortiqcha optimizm"dan ogohlantiryapti.

Kreml matbuot kotibi Dmitriy Peskov, Rossiya "yaxshilikka umid qilishi, ammo yomonlikka tayyor turishi" kerakligini ta’kidlab, Vashingtonning Kiyevdan uzoqlashishga bo‘lgan urinishlariga ehtiyotkorlik bilan yondashishga chaqirdi.

"Voqelikka ortiqcha optimizm bilan qaramang," dedi Kreml rasmiysi Moskvadagi Oliy iqtisodiyot maktabi tinglovchilariga, Rossiya o‘z manfaatlarini himoya qilish uchun "doimo shay turishi zarur"ligini ta’kidlab.

Tramp ma’muriyati Kiyevga harbiy yordam va razvedka ma’lumotlarini almashishni to‘xtatgan bo‘lsa-da, Peskov Ukrainaning ko‘p oylar davomida jang qilish uchun yetarli qurol-yaroqqa ega ekanligini aytdi. Ilon Maskning Ukraina qo‘shinlari uchun Starlink internet xizmatini to‘xtatishi ehtimoli haqida fikr bildirar ekan, Peskov buning o‘rnini qoplash uchun "boshqa bir narsa" ishga tushirilishini aytdi.