“Oskar” mukofotini topshirish marosimi endi YouTubeda namoyish etiladi

Bu haqda Amerika kino akademiyasining bayonotida aytilgan, deb xabar beradi BBC.

Xabarda ta’kidlanganidek, Akademiya va YouTube o‘rtasidagi kelishuv 2033 yilgacha mo‘ljallangan. Biroq, CNN ma’lumotlariga ko‘ra, ushbu kelishuv ko‘ngilochar sanoati uchun burilish nuqtasi bo‘ladi. Chunki translyasiya an’anaviy televideniyedan ​​global striming platformasiga o‘tadi.

Huquqlar paketiga mukofotlash marosimining o‘zi, qizil gilam, beksteydj va Gubernatorlar balining translyasiyalari kiradi. Barcha kontent butun dunyo bo‘ylab tomoshabinlar uchun bepul translyasiya qilinadi.

"Kelishuv tomonlari platformaga o‘tish chegaralarni bartaraf etishiga va “Oskar” mukofotlarini xalqaro auditoriya uchun chinakamiga ochiq qilishiga umid qilmoqda", - deb yozadi CNN.

Disney kompaniyasiga tegishli bo‘lgan va «Oskar»ni 50 yildan ortiq vaqt davomida namoyish qilib kelgan ABC kanali taqdirlash marosimini endi yana uch marta ko‘rsatadi. 2028 yilda bo‘lib o‘tadigan yubiley, 100-chi mukofot marosimi kanal uchun so‘nggisi bo‘ladi.

«Biz 2028 yilda mashhur mukofotning yuz yilligini nishonlash bilan birga, oldinda turgan uchta translyasiyani intiqlik bilan kutamiz va Kinematografik san’at va fan akademiyasiga kelgusi faoliyatida muvaffaqiyat tilaymiz», - deb yozdi ABC vakillari.