Oq uyda G‘azo bo‘yicha muhokama yig‘ilishi bo‘ladi — Uitkoff

AQSh prezidenti Donald Tramp raisligida G‘azo bo‘yicha yig‘ilish tashkil etilishi kutilmoqda. Yig‘ilish tafsilotlari oshkor etilmagan bo‘lsa-da, Vashington urush yil oxirigacha tugashiga umid qilmoqda.

Trampning Yaqin Sharq bo‘yicha maxsus vakili — Stiv Uitkoff Fox News telekanaliga bergan intervyusida bu haqda ma’lum qildi. (https://www.foxnews.com/video/6377460562112)

«Ertaga Oq uyda prezident raisligida katta yig‘ilishimiz bor va biz ertangi kunga juda keng qamrovli reja tayyorlayapmiz. Biz bu masalani bir yo‘l bilan bo‘lmasa boshqa yo‘l bilan, albatta yil oxirigacha hal qilamiz, deb o‘ylaymiz» — deydi Uitkoff

Uning aytishicha, Isroil Hamas bilan muzokaralarni davom ettirishga tayyor, Hamas ham kelishuvga ochiqligini bildirgan. Shu kunning o‘zida AQSh davlat kotibi Marko Rubio Vashingtonda Isroil tashqi ishlar vaziri Gideon Saar bilan uchrashishi rejalashtirilgan.

Reuters yozishicha, Tramp saylov kompaniyasida va prezidentlikning dastlabki oylarida G‘azodagi urushni tez tugatishga va’da bergandi. Biroq yetti oy o‘tsa-da, maqsad amalga oshmagan. Tramp prezident sifatida faoliyatini sulh bilan boshlagan edi, lekin u ikki oydayoq yakunlandi.

So‘nggi haftalarda G‘azodagi ochlikdan aziyat chekishayotgan falastinliklar, ayniqsa bolalar surati xalqaro hamjamiyatni qo‘zg‘atdi. 25 avgust kuni Isroil armiyasining Nasser shifoxonasiga zarbasi 21 kishi, jumladan, 6 jurnalistning o‘limiga olib keldi. Bu holatni Binyamin Netanyahu «fojiali xato» deb atadi, Tramp esa vaziyat yaqin haftalarda yaxshilanishiga ishonch bildirdi.

2023 yil oktyabrdan buyon Isroilning hujumlari natijasida 62 mingdan ziyod falastinlik halok bo‘ldi. Bu ochlik inqirozi va ommaviy ko‘chishga sabab bo‘ldi, shu bilan birga Isroilga nisbatan genosid ayblovlarini kuchaytirdi. Ayni paytda Isroilning o‘zida ham urushga qarshi norozilik namoyishlari davom etmoqda.