Mourinyo Turkiya klubidan haydaldi

Portugaliyalik mutaxassis Joze Mourinyo "Fenerbaxche" bosh murabbiyligidan ozod etildi. Bu haqda klub matbuot xizmati xabar berdi.

"Biz Joze Mourinyo bilan xayrlashdik. Unga jamoamiz rivojiga qo‘shgan hissasi uchun minnatdorchilik bildiramiz va kelajakdagi faoliyatida muvaffaqiyatlar tilaymiz", - deyiladi klub bayonotida.

62 yoshli Mourinyo "Fenerbaxche"ni 2024 yilning iyulidan buyon boshqarib kelayotgandi. Jamoa o‘tgan mavsumni Turkiya chempionati turnir jadvalida ikkinchi o‘rinda yakunlagandi. 27 avgust kuni "Fenerbaxche" safarda "Benfika"ga imkoniyatni boy berib, ikki o‘yin natijasiga ko‘ra (0:0, 0:1) Chempionlar ligasining umumiy bosqichiga yo‘llanmani qo‘lga kirita olmadi.