Madridning «Real» klubi bosh murabbiyi Joze Mourinyo Ispaniya futbolida bir necha yildan buyon muhokama qilinayotgan «Negreyra ishi» yuzasidan yana bir bor o‘z munosabatini bildirdi. Portugaliyalik mutaxassis mazkur vaziyatni Italiya futboli tarixidagi mashhur «Kalchopoli» mojarosi bilan solishtirib, ispan futbolida hozirgacha jiddiy chora ko‘rilmaganini tanqid qildi.
«Negreyra ishi» atrofidagi bahslar
Mazkur ish «Barselona» klubining Ispaniya hakamlar texnik qo‘mitasi sobiq vise-prezidenti Xose Mariya Enrikes Negreyra va unga aloqador kompaniyalarga yillar davomida millionlab yevro to‘lagani bilan bog‘liq.
Tergov jarayonida ushbu to‘lovlarning asl maqsadi o‘rganilmoqda. «Real» tomoni esa mazkur moliyaviy munosabatlar orqali hakamlik qarorlariga ta’sir o‘tkazilgan bo‘lishi mumkinligini ta’kidlamoqda.
«Barselona» o‘z navbatida ayblovlarni rad etib, pullar hakamlar faoliyatiga oid tahliliy hisobotlar va maslahat xizmatlari uchun to‘langanini bildirgan.
Mourinyo Italiya tajribasini misol keltirdi
«Real» ustozi Prime Video Italia telekanaliga bergan intervyusida 2006 yilda Italiya futbolida yuz bergan «Kalchopoli» mojarosini esladi.
O‘sha paytda «Yuventus» hakamlik bilan bog‘liq qoidabuzarliklar sabab Seriya Bga tushirilgan va klubga nisbatan boshqa jazo choralari ham qo‘llanilgan edi.
Mourinyo Italiyada qabul qilingan qarorlarni ijobiy baholab, Ispaniyadagi vaziyatga ham jiddiy yondashish lozimligini ta’kidladi.
«Men faqat bir narsani aytaman: italiyaliklarni tabriklayman. Chunki Italiya «Kalchopoli» mojarosiga haqiqiy mojaro sifatida munosabat bildirgan yagona mamlakat bo‘ldi. Ispaniyada nima sodir bo‘lganini hamma biladi, biroq hozirgacha hech narsa bo‘lgani yo‘q», — dedi portugaliyalik murabbiy.
«Bu hakamlik tarixidagi eng yirik mojaro bo‘lib qolishi mumkin»
Mourinyo o‘z fikrini davom ettirib, «Negreyra ishi» bo‘yicha tegishli qarorlar qabul qilinmasligi futbolga bo‘lgan ishonchga salbiy ta’sir ko‘rsatishi mumkinligini bildirdi.
«Agar bu vaziyat bo‘yicha hech qanday chora ko‘rilmasa, u jahon hakamligi tarixidagi eng katta korrupsiya mojarosiga aylanishi mumkin», — deya qo‘shimcha qildi «Real» bosh murabbiyi.
Portugaliyalik mutaxassisning mazkur bayonoti Ispaniya futbolidagi hakamlik tizimi va «Negreyra ishi» atrofidagi muhokamalarni yana kun tartibiga olib chiqdi.
Ayni paytda ish yuzasidan sud jarayonlari davom etmoqda. «Barselona»ning hakamlik qarorlariga ta’sir ko‘rsatish maqsadida korrupsion harakatlarni amalga oshirgani haqida yakuniy sud hukmi mavjud emas.
Ronalduning sevgilisi Messining oilasiga uchta so‘z bilan murojaat qildi
«Oltin to‘p»-2026 uchun asosiy da’vogar nomi ma’lum bo‘ldi
«Barselona» futbolchisini 500 million yevroga sotmoqchi
