Rossiya Ukrainada rus harbiy asirlariga nisbatan qiynoqlar qo‘llanilgani haqidagi ma’lumotlarni BMT Xavfsizlik Kengashiga taqdim etishni rejalashtirmoqda. Bu haqda Rossiya Tashqi ishlar vazirligining Ukraina bo‘yicha maxsus vakili Rodion Miroshnik ma’lum qildi.
«Tasnim» agentligi xabar berishicha, Moskva asirlar almashinuvi orqali Rossiyaga qaytarilgan harbiylarning ko‘rsatmalari asosida Ukraina hududidagi maxfiy qamoqxonalar haqidagi ma’lumotlarni xalqaro hamjamiyatga yetkazmoqchi.
Miroshnikning ta’kidlashicha, qaytarilgan harbiylar ushbu muassasalarda sodir bo‘lgan voqealar haqida batafsil ma’lumot bergan. To‘plangan materiallarda shafqatsiz muomala va qiynoqlar bilan bog‘liq holatlar qayd etilgani aytilmoqda.
Uning so‘zlariga ko‘ra, bu ma’lumotlar 14 oktyabr kuni BMT Xavfsizlik Kengashining «Arria formulasi» bo‘yicha o‘tkaziladigan norasmiy uchrashuvida taqdim etiladi. Muhokamaning asosiy mavzusi Ukrainadagi inqiroz sharoitida xalqaro gumanitar huquq va inson huquqlari buzilishi bo‘ladi.
Avvalroq, sentyabr oyi oxirida Rossiya Tashqi ishlar vazirligi vakili Ukrainadagi maxfiy qamoqxonalarda rus harbiy asirlari elektr toki bilan qiynoqqa solingani, kaltaklangani va ularga asab tizimiga ta’sir qiluvchi dorilar yuborilgani haqida da’vo qilgan edi. Shuningdek, asirlarga itlar hujum qildirilgani aytilgan.
Rossiya tomonining ta’kidlashicha, mazkur qamoqxonalarning joylashuvi va u yerda ishlovchi shaxslarning kimligi yashiriladi. Biroq keltirilgan da’volarning barchasi mustaqil manbalar tomonidan tasdiqlangani haqida xabarda ma’lumot berilmagan.
MrBeast: “O‘zbekistonda muxlislarim shu qadar ko‘pki, balki ketishimizga to‘g‘ri kelar”
Germaniya Rossiya bilan dizel yoqilg‘isi yetkazib berish bo‘yicha kelishuv tuzishni taklif qildi
AQSh Rossiya neftni qayta ishlash zavodlariga qilingan zarbalar tufayli Ukrainaga qurol yetkazib berishni to‘xtatish bilan tahdid qilmoqda
