Matbuot bilan qarama-qarshilik: CNN jurnalistiga Tramp bilan uchish taqiqlandi

Oq uy CNN jurnalistining AQSh prezidenti Donald Tramp bilan Tennessi shtatiga uchadigan «Eyr Fors Uan» samolyotida bo‘lishiga ruxsat bermadi.

Ma’lum qilinishicha, bu qaror Tramp ma’muriyatining ayrim ommaviy axborot vositalari bilan davom etayotgan qarama-qarshiligi doirasida qabul qilingan.

Avvalroq Tramp CNN, MSNBC va Politico jurnalistlarining Oq uyga kirishini cheklagan va ularni «soxta xabarlar» tarqatishda ayblagan edi. Uchta nashr ma’muriyat qarorini matbuot erkinligiga tajovuz sifatida baholab, sudga murojaat qilgan.

Federal sud qarori ortidan CNN, MSNBC va Politico jurnalistlarining Oq uyga kirish huquqi qayta tiklangan edi. Biroq CNN jurnalistining prezident bilan parvoz qilish imkoniyati cheklandi.

Tramp ma’muriyati va ommaviy axborot vositalari o‘rtasidagi nizo matbuot erkinligi va Oq uy jurnalistlariga kirish imkoniyati masalalari bo‘yicha bahslarni kuchaytirmoqda.