"Manchester Siti" muxlislari klubni sudga berdi

"Manchester Siti"ning bir guruh muxlislari abonementlar qoidalariga kiritilgan o‘zgartirishlar yuzasidan klub ustidan sudga murojaat qilishdi.

Bu haqda The Guardian xabar bermoqda. Kasaba uyushmasi a’zolaridan tashkil topgan "Trade Union Blues" muxlislari guruhi Leigh Day advokatlik firmasi bilan bog‘lanib, klubning abonement egalariga qo‘ygan talablarini e’tirozga soldi. Yangi qoidalarga ko‘ra, muxlislar abonementini yangilash huquqini saqlab qolish uchun mavsumda kamida 16 ta uy uchrashuviga kelishi kerak. Ushbu o‘yinlarning faqat oltitasi uchun chiptani boshqa shaxsga o‘tkazish yoki qayta sotish uchun klubga qaytarish mumkin.

Guruh vakillarining fikricha, ushbu tizim individual holatlarni hisobga olmaydi va iste’molchilar huquqlarini buzishi mumkin. Ularning fikricha, "Siti"ning yondashuvi turli sabablarga ko‘ra stadionga muntazam tashrif buyura olmaydigan muxlislarni kamsitadi. Oldinroq klub abonement egalarining o‘rtacha 8 foizi (jami 37 mingdan) uy uchrashuvlariga kelmasligi haqida xabar bergan edi.