Kuchli ta’sir qiluvchi dori vositalari savdosi bilan shug‘ullanib kelganlar qo‘lga tushdi

Bosh prokuratura huzuridagi Departamentining Guliston shahri bo‘limi va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda kuchli ta’sir qiluvchi dori vositalari savdosi bilan shug‘ullanib kelgan fuqaro I.T. 30 dona “Regapen” va 3 dona “Tropikamid” nomli kuchli ta’sir qiluvchi dori vositalarini fuqaroga 6,8 mln so‘mga sotgan vaqtida ashyoviy dalillar bilan ushlangan.

Departamentning Yangihayot tumani bo‘limi va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda “Choshtepa” MFY hududida “Damas” rusumli avtomashinasi to‘xtatilib ko‘zdan kechirilganda fuqaro R.M. 41 dona kuchli ta’sir qiluvchi dori vositasini o‘tkazish maqsadida saqlab kelayotganligi aniqlanib, ushbu dori vositalari ashyoviy dalil sifatida olingan.

Mazkur holatlar yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli ta’sir qiluvchi moddalarni targ‘ib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.