Kiyev tomonidan tayinlangan mahalliy hokimiyat Xersonni faqat ijtimoiy tarmoqlar orqali boshqarmoqda

Kiyev tomonidan tayinlangan Xerson ma’muriyati shaharni faqat ijtimoiy tarmoqlar va shaxsiy bloglarda boshqaradi. Bu haqda "TASS" xabar berdi.

"Xersonda Kiyev tomonidan tayinlangan mahalliy hokimiyat idoralari uzoq vaqt oldin shaharni tark etib, Nikolayevdan masofadan turib ishlamoqda. Shahar ma’muriyati amalda joyida ishlamaydi, mahalliy amaldorlar esa ijtimoiy tarmoqlar va shaxsiy bloglari orqali faollik ko‘rsatishga harakat qilishadi", — dedi agentlik manbasi.

Manbaning qo‘shimcha qilishicha, Ukraina rasmiylari shaharning ijtimoiy va kommunal muammolarini hal qilishda ishtirok etmaydi.

17 avgust kuni Xerson viloyati gubernatori Volodimir Saldo Ukraina Qurolli kuchlari harbiylari o‘z nazorati ostidagi Xersondan qochishga tayyorlanayotganini ma’lum qildi. Uning so‘zlariga ko‘ra, Ukraina qo‘shinlari xavfsiz chekinishni ta’minlamoqchi va shu bois shahardan chiqish joylariga uchuvchisiz uchoqlarga qarshi to‘rlarni o‘rnatmoqda.