Kichiksoy — Nurota tog‘lari etagidagi turizm qishlog‘i

Navoiy viloyatining Nurota tumani o‘zining betakror tabiati, boy madaniy merosi va qadimiy an’analari bilan sayyohlar e’tiborini tortib kelmoqda. Ana shunday go‘zal maskanlardan biri — Kattasoy mahallasi hududida joylashgan Kichiksoy qishlog‘idir. 2026 yil 25 avgust kuni ushbu qishloqqa rasman «Turizm qishlog‘i» maqomi berildi.

Mazkur maqom hududning turistik salohiyatini yanada oshirish, ekologik va etnografik turizmni rivojlantirish hamda mahalliy aholining daromad manbalarini kengaytirish yo‘lidagi muhim qadamlardan biridir.

Milliy qadriyatlar va zamonaviy turizm uyg‘unligi

Bugungi kunda Kichiksoy qishlog‘ida 20 ta oilaviy mehmon uyi faoliyat yuritmoqda. Sayyohlarga mahalliy gidlar hamrohligidagi ekskursiyalar, tabiat qo‘ynida sayr qilish va qishloq hayoti bilan yaqindan tanishish imkonini beruvchi 15 dan ortiq turistik xizmat turi taklif etilmoqda.

Hududda yo‘llarni ta’mirlash, obodonlashtirish va infratuzilmani yaxshilash bo‘yicha ishlar amalga oshirilgan. Shuningdek, tashrif buyuruvchilarning maroqli hordiq chiqarishlari uchun jamoat foydalanishidagi suzish havzasi ham tashkil etilgan.

Bu kabi qulayliklar Kichiksoyning mahalliy va xorijiy sayyohlar uchun jozibadorligini oshirishga xizmat qilmoqda.

Qishloq hayotiga sayohat

Kichiksoyning eng muhim jihati shundaki, bu yerda sayyohlar nafaqat go‘zal tabiatdan bahramand bo‘lishadi, balki an’anaviy qishloq turmush tarzini ham yaqindan his etish imkoniga ega bo‘lishadi.

Mehmonlar sigir va echki sog‘ish jarayonida qatnashishi, tabiiy sut mahsulotlari, jumladan, milliy tansiq taomlarimizdan biri — qursoqni emas, qursoq emas, qurtni tatib ko‘rishi, tandirda non yopish sirlarini o‘rganishi mumkin. Shuningdek, gilamdo‘zlik va boshqa milliy hunarmandchilik turlari bilan tanishish orqali xalqimizning asrlar davomida shakllangan urf-odatlari va mahoratiga guvoh bo‘lishadi.

Bunday tajribalar, ayniqsa, O‘zbekistonning milliy madaniyati, an’analari va kundalik hayotiga qiziqadigan xorijiy sayyohlar uchun alohida ahamiyatga ega.

Nurota tog‘lari bag‘rida faol dam olish

Tabiat qo‘ynida hordiq chiqarishni xush ko‘ruvchilar uchun Kichiksoy va uning atrofidagi hududlar keng imkoniyatlarni taqdim etadi. Nurota tog‘lari etaklarida piyoda sayr qilish, otda sayohatga chiqish va tog‘ manzaralaridan bahramand bo‘lish mumkin.

Qishloqning madaniy dasturlari esa mahalliy folklor jamoalarining chiqishlari bilan yanada boyitilgan. Bu sayyohlarga hududning o‘ziga xos musiqasi, milliy san’ati va madaniy merosini yaqindan kashf etish imkonini beradi.

Turizm orqali yangi imkoniyatlar

Kichiksoy qishlog‘iga «Turizm qishlog‘i» maqomining berilishi hududning iqtisodiy va ijtimoiy rivojlanishi uchun ham yangi imkoniyatlar yaratadi. Oilaviy mehmon uylari, mahalliy gidlar, hunarmandlar va milliy taomlar tayyorlovchi aholi vakillari uchun turizm qo‘shimcha daromad manbaiga aylanishi mumkin.

Eng muhimi, bu jarayon milliy urf-odatlar, hunarmandchilik va an’anaviy turmush tarzini asrab-avaylash hamda kelajak avlodlarga yetkazishga xizmat qiladi.

Kichiksoy — shunchaki tog‘ etagidagi sokin qishloq emas. Bu yerda tabiat go‘zalligi, milliy qadriyatlar va samimiy mehmondo‘stlik o‘zaro uyg‘unlashgan. Qishloqning turistik salohiyatidan samarali foydalanish esa Nurota tumanining turizm xaritasidagi o‘rnini yanada mustahkamlashga xizmat qilishi shubhasiz.