Kennedi oilasi Donald Tramp ma’muriyati ilgari surayotgan balandligi 250 fut (taxminan 76 metr) bo‘lgan tantanali arka qurilishini to‘xtatish talabi bilan Vashingtondagi federal sudga da’vo arizasi kiritdi.
Bu haqda CNN telekanali ma’lum qilgan.
Da’vogarlar sifatida oilaning to‘qqiz nafar a’zosi qatnashmoqda. Ularning ta’kidlashicha, arka Arlington milliy qabristonida dafn etilgan qarindoshlarining qabrlari, jumladan, Jon Kennedining abadiy yonib turuvchi olovi, shuningdek, yuz minglab halok bo‘lgan amerikalik harbiylar xotirasiga bag‘ishlangan yodgorliklarni ko‘rishga to‘sqinlik qiladi.
Oilaning baholashicha, inshoot Linkoln yodgorligidan ikki baravar baland bo‘lib, maydoni jihatidan 25 qavatli ofis binosiga teng. Shuningdek, ular ma’muriyat qurilish ishlarini shoshilinch boshlaganini ta’kidlamoqda.
Kennedi oilasi o‘tgan oyda Vashington va Virjiniya ma’muriyatlari, shuningdek, faxriylar hamda Arlington okrugi tomonidan kiritilgan da’voga qo‘shildi.
Da’vogarlar manfaatlarini himoya qilayotgan Demokratiyani himoya qilish jamg‘armasi advokatlari Norman Eyzen va Stiv Jonasning ta’kidlashicha, arka qurilishi qabriston ishlariga va qahramonlar xotirasiga noqonuniy aralashuv hisoblanadi. Ularning fikricha, bunday ko‘lamdagi qurilishga faqat Kongress ruxsat berishi mumkin.
O‘tgan hafta federal sudya arka qurilishini 14 kunga to‘xtatib, inshoot o‘rnatilishi rejalashtirilgan hududda har qanday ishlarni amalga oshirishni taqiqladi.
Tramp loyihani ikki yildan keyin prezidentlik lavozimini tark etishidan oldin yakunlashni rejalashtirgan edi. Biroq sud jarayonlari qurilish muddatlariga ta’sir ko‘rsatdi.
O‘zbekistonda keskin sovuq va kuchli yog‘ingarchilik kutilmoqda
Erkinjon Turdimov beshta rektorni ishdan bo‘shatdi
Chaqalog‘ini hojatxonaga tashlagan ayolga 3 yillik jazo tayinlandi
