2026 yilgi Jahon chempionati startiga yaqinlashganimiz sari tashkiliy masalalar oydinlashmoqda. FIFA turnir ishtirokchilari uchun jami 61 ta qarorgohni (lokasiya) tasdiqladi. E’tiborlisi, hamyurtlarimizning mundial davomida qayerda qo‘nim topishi ham ma’lum bo‘ldi.
O‘zbekiston milliy terma jamoasi musobaqa davomida AQShning Atlanta shahrida istiqomat qiladi. Vakillarimiz mashg‘ulotlarni MLSning taniqli klublaridan biri — «Atlanta Yunayted» jamoasiga tegishli zamonaviy qarorgohda olib borishadi. Bu baza barcha zarur sharoitlar va yuqori texnologik tiklanish markazlari bilan ta’minlangani bilan ajralib turadi.
Guruhdagi raqiblarimiz ham o‘z joylarini aniqlab olishgan:
Portugaliya: Palm Bich Gardens (Florida) shahrida;
Kolumbiya: Kolumbus (Ogayo) shahrida o‘rnashadigan bo‘ldi.
FIFA bazalarni taqsimlashda jamoalarning o‘yinlari o‘tadigan stadionlar geografiyasini inobatga olgan. Rejaga ko‘ra, terma jamoamiz o‘yin o‘tadigan shaharlarga maxsus charter reyslari orqali borib keladi. Bahs yakunlangach, futbolchilar yana Atlantadagi o‘z bazasiga qaytib, keyingi bahsga tayyorgarlikni davom ettirishadi.
Bunday tizim futbolchilarning ortiqcha charchab qolmasligi va doimiy muhitda tiklanishi uchun xizmat qiladi.
"Manchester Siti" ham Abduqodir Husanovga murojaat qildi
Ronaldu o‘z maqsadiga erishdi
Mashhur model Husanovga uchrashuv taklif qildi
