Jalolobodda tog‘-chang‘i kurorti barpo etiladi

Poytaxtimizda 17 iyul kuni bo‘lib o‘tgan O‘zbekiston – Qirg‘iziston biznes-forumida iqtisodiyotning turli tarmoqlariga investisiya kiritish, jumladan Jalolobod viloyatida yil davomida faoliyat ko‘rsatadigan “Chotqol kurorti” tog‘-chang‘i dam olish maskani barpo etish ko‘zda tutilgan kelishuvlarga erishildi.

Anjumanda Qirg‘iz Respublikasi Iqtisodiyot va savdo vazirligi huzuridagi Turizm departamenti va mamlakatimiz Turizm qo‘mitasi hamkorligida amalga oshiriladigan mazkur loyiha yuzasidan memorandum imzolandi.

Hujjatga asosan tomonlar quyidagi yo‘nalishlarda ish olib boradi:

– Davlat, mahalliy hokimiyat idoralari va boshqa manfaatdor tuzilmalar hamkorligiga ko‘maklashish va ikki mamlakatda turizm barqaror rivojlanishini ta’minlash;

– tomonlar hududlari iqtisodiyotini barqaror rivojlantirish;

– har ikki davlatga turistlar oqimini jalb qilish;

– sohaga sarmoya jalb etishga ko‘maklashish, investisiyani ikki va ko‘p tomonlama qo‘llab-quvvatlash;

– “Chotqol kurorti” tog‘-chang‘i dam olish maskani” investisiya loyihasini amalga oshirish doirasida mutaxassislar o‘rtasida tajriba va bilim almashinuvini yo‘lga qo‘yish;

– dam olish maskanlarida sayyohlik imkoniyatini targ‘ib qilishga hissa qo‘shish.

2024-2028 yillarda Jalolobod viloyati Chotqol tumanida barpo etiladigan ushbu majmua mamlakatimiz turizm sanoati rivojiga xizmat qilishi shubhasiz.