Isroil «Hizbulloh»ni yo‘q qilish bilan tahdid qildi

Isroil mudofaa vaziri Israel Kas Eronni qo‘llab-quvvatlash haqida «Hizbulloh» harakati vakili Naim Kasem aytgan so‘zlar fonida harakatga nisbatan qattiq bayonot bilan chiqdi. Vazirning so‘zlariga ko‘ra, mojaroga har qanday aralashuv jiddiy oqibatlarga olib keladi.

«Hizbulloh bosh kotibi o‘zdan avvalgilarning taqdiridan xulosa chiqarmagan», — deb yozdi Kas ijtimoiy tarmoqlarda, harakatning sobiq qo‘mondonlari, jumladan Hasan Nasrulloh va Hoshim Safiuddinning o‘ldirilishi haqida eslatar ekan.

❕ U Kasemni «Eron rahbariyati buyrug‘i bilan Isroilga tahdid qilishda» aybladi va «Isroil o‘z xavfsizligiga tahdid qiluvchilarga nisbatan sabri tugaganini» ta’kidladi.

❌ Vazirning aytishicha, Isroil har qanday hujumni «Hizbulloh»ni harbiy kuch sifatida yo‘q qilish uchun sabab deb biladi.

19 iyun kuni Naim Kasem «Hizbulloh» Eron tomonida ekanini va Isroilga qarshi to‘qnashuvda Tehronni qo‘llab-quvvatlash «harakatning burchi» ekanini aytdi. Uning ta’kidlashicha, maqsad — «Isroil tajovuzini to‘xtatish».

«Hizbulloh» bayonotida, shuningdek, Eron rahbari Oliy ayatullo Aliy Xomanaiyga nisbatan bo‘lishi mumkin bo‘lgan so‘iqasd «jiddiy oqibatlarga olib kelishi» haqida ogohlantiruv berilgan.

Bundan avval AQShning Suriya bo‘yicha maxsus vakili Tom Barak ham «Hizbulloh» harakatiga nisbatan qattiq bayonot bilan chiqqan edi. Uning ta’kidlashicha, harakatning amaldagi mojaroga aralashishi — «juda-juda yomon qaror» bo‘ladi.

«Prezident Tramp nomidan ayta olaman — bu mutlaqo aqlga to‘g‘ri kelmaydigan ish bo‘ladi», — dedi Barak, harakatning ehtimoliy roli haqidagi savolga javob berib.

AQSh tomoni aralashuv holatda qanday choralar ko‘rilishi haqida aniqlik kiritmagan, biroq «Hizbulloh»ning har qanday harakati jiddiy keskinlashuv sifatida baholanishini ta’kidlagan.