Isroil armiyasi sulhga qaramay Janubiy Livanga zarbalarni qayta boshladi

Eskalasiya yangi qurbonlarga olib keldi va tinch aholining mamlakat ichkarisiga ommaviy ko‘chib ketishiga sabab bo‘ldi.

Isroil armiyasi amalda bo‘lgan o‘t ochishni to‘xtatish kelishuvini e’tiborsiz qoldirib, Livanning janubiy hududlariga bir qator kuchli zarbalar berdi.

Livan rasmiy NNA agentligi xabariga ko‘ra, Isroil samolyotlari Yuqori Nabatiya, Kfar-Tebnit va Burj-Rehall aholi punktlariga hujum qilgan. Tinch aholi orasida jarohatlanganlar borligi qayd etilgan.

Avvalroq Isroil bosh vaziri Binyamin Netanyahu harbiylarga Livan hududlariga keng ko‘lamli hujumlar boshlashni buyurgan. Livan Sog‘liqni saqlash vazirligi ma’lum qilishicha, ushbu zarbalar natijasida yetti kishi halok bo‘lgan.

Bevosita zarbalardan tashqari, Isroil harbiylari Livanning janubi-sharqidagi aholiga tahdidlar ham yo‘llagan. Qo‘mondonlik aholiga zudlik bilan uylarini tark etishni talab qilgan. Bu esa yangi ko‘chish to‘lqiniga sabab bo‘ldi: Sayda shahri tomon olib boruvchi yo‘llarda avtomobillar harakati keskin kuchaygan.

17 aprel kuni sulh kuchga kirgach uylariga qayta boshlagan oilalar endi yana shimolga qochishga majbur bo‘lmoqda. Livan hukumati ma’lumotlariga ko‘ra, 2 martdan buyon boshlangan keng ko‘lamli keskinlik tufayli Isroil armiyasi 1,16 milliondan ortiq odamni uyini tark etishga majbur qilgan.

Xalqaro darajadagi keskinlikni kamaytirishga qaratilgan sa’y-harakatlarga qaramay vaziyat yomonlashmoqda. Avvalroq AQSh prezidenti Donald Tramp vaqtinchalik o‘t ochishni to‘xtatish rejimi yana uch haftaga uzaytirilganini e’lon qilgan edi, biroq Isroil armiyasi harbiy harakatlarni davom ettirmoqda.