Indoneziyada vulqon otilishi 1,5 mingdan ortiq aviareys kechikishiga sabab bo‘ldi

Anak-Krakatau vulqoni otilishi reyslar bekor qilinishiga olib keldi va ba’zi maktablar darslarni to‘xtatishga majbur bo‘ldi. Foto: EPA Mahalliy rasmiylarga ko‘ra, yakshanba tongida aeroport yaqinidagi havo kengligida Anak-Krakatau vulqonidan chiqqan kul aniqlangach, 209 ta reys to‘xtatilgan yoki keyinga qoldirilgan. Yava va Sumatra orollari o‘rtasidagi Sunda bo‘g‘ozida joylashgan vulqon juma kuni kechqurun otila boshladi, bu esa uzluksiz seysmik faollikni keltirib chiqardi hamda atrofga lava oqib chiqdi. Rasmiylarga ko‘ra, yakshanba kuni erta tongda yana ikki marta vulqon otilishi kuzatilgan. Aeroport vaqtincha (mahalliy vaqt bilan soat 13:30 gacha) ishlamagan, bu esa 22 ming kishining hayotiga turli darajada ta’sir ko‘rsatgan. Transport vazirligi xabar qilishicha, parvozlar to‘xtatilishi asosan Singapurga boruvchi va u yerdan keluvchi reyslarga, shuningdek, Doha, Sidney va Kuala-Lumpur kabi boshqa xalqaro yo‘nalishlarga ta’sir qilgan. Rasmiylar vulqon faollashgani bilan bog‘liq ravishda sunami xavfi yo‘qligini tasdiqlagan. Sog‘liqni saqlash vazirligi jabrlangan hududlar aholisini yopiq binolarda qolishga hamda tibbiy niqoblardan foydalanishga chaqirgan. Mahalliy Kompas nashri ma’lumotiga ko‘ra, bir necha maktabda shanba kuni darslar bekor qilingan, o‘quvchilar va aholi kul tufayli ko‘zlari achishganidan shikoyat qilgan. Baliqchilar ham ko‘zdagi og‘riqdan shikoyat qilishgan va dam olish kunlari dengizga chiqishmagan.