Hindistonda dunyodagi eng baland temir yo‘l ko‘prigi ochildi

Hindistonning Kashmir vodiysini mamlakatning boshqa hududlari bilan bog‘lovchi dunyodagi eng baland temir yo‘l ko‘prigi ochildi, deya bosh vazir Narendra Modi X ijtimoiy tarmog‘idagi sahifasida ma’lum qildi.

Qayd etilishicha, 2003 yilda boshlangan qurilish ishlari Hindistonga 160 million dollarga tushgan. Ko‘prikda -10 darajadan +40 darajagacha bo‘lgan haroratga chidamli po‘lat materiallardan foydalanilgan.

Ko‘prik Chenob daryosi ustidan o‘tgan bo‘lib, u dengiz sathidan 359 metr balandlikda qurilgan. Inshootning umumiy uzunligi 1,3 kilometrdan ortiqni tashkil etadi.

Chenob temir yo‘l ko‘prigi dizayndagi ixtirochilik va qurilish mahoratini namoyish etadi. U aloqalarni mustahkamlaydi, shu tariqa savdo-sotiq, tijorat va turizmni rag‘batlantiradi, — dedi Hindiston bosh vaziri.

6 iyun kuni ko‘prikdan ilk bor ikkita yo‘lovchi poyezdi o‘tgan. Mazkur ko‘prik 272 kilometrlik Udxampur—Srinagar—Baramulla (USBRL) temiryo‘l liniyasining bir qismi hisoblanadi. U Jammu va Kashmirning olis hududlarini Hindistonning qolgan qismi bilan bog‘laydi.