HAMAS G‘azo sektoridagi qochqinlar uchun ajratilgan chodirlarni musodara qilishda ayblandi

HAMASning qurollangan vakillari gumanitar tashkilotlar tomonidan G‘azo sektori aholisiga taqdim etilgan chodirlarni musodara qilishda ayblanmoqda. The Telegraph nashri xabar berishicha, guruh gumanitar yordamning bir qismini taqsimlashni o‘z nazoratiga olib, bu orqali daromad olishga uringan. Mazkur ayblovlar Falastinlik ko‘chirilgan aholi lagerlarini kuchli yomg‘ir va suv toshqinlari qamrab olgan bir paytda yangradi.

The Telegraph ma’lumotlariga ko‘ra, HAMAS xavfsizlik xizmati xodimlari BMT Taraqqiyot dasturi bilan hamkorlikda qochqinlar lagerlaridagi sharoitni yaxshilash ustida ishlagan mahalliy mansabdor shaxslarni ushbu hududlarga boshqa bormaslik to‘g‘risidagi majburiyatni imzolashga majbur qilgan.

Loyiha doirasida ajratilgan chodirlarning bir qismi ham musodara qilingan bo‘lishi mumkin.

Kuchli yomg‘irlar oqibatida G‘azo sektoridagi qariyb 70 mingta chodir suv ostida qolgan. Dayr al-Balah shahrida qum to‘sig‘ining o‘pirilishi bir necha kishining hayotiga zomin bo‘lgan.

Ayniqsa, chodir lagerlarida yashashga majbur bo‘lgan 1,4 millionga yaqin ko‘chirilgan aholi og‘ir ahvolda qolmoqda.

Xalqaro tashkilotlar Isroilni ham vaqtinchalik boshpanalar qurish uchun zarur materiallar yetkazib berilishini cheklashda ayblamoqda.

BMT ma’lumotlariga ko‘ra, G‘azo sektoriga olib kirish uchun ruxsat kutayotgan chodirlar soni qariyb 150 mingtani tashkil etmoqda.