Rossiya prezidenti Vladimir Putin G‘arb elitalari Rossiyada ichki beqarorlikni keltirib chiqarishga harakat qilayotganini, ammo bunday urinishlar samara bermayotganini bildirdi.

Uning so‘zlariga ko‘ra, Rossiya misli ko‘rilmagan tashqi bosimga duch kelmoqda, ammo mamlakatga strategik mag‘lubiyat yetkazish yoki jang maydonida g‘alaba qozonishning iloji bo‘lmayapti.

«Rossiya G‘arb elitalarining misli ko‘rilmagan bosimini boshdan kechirmoqda. Ular bizga strategik mag‘lubiyat yetkaza olmayaptilar, jang maydonida g‘alaba qozona olmayaptilar. Shuning uchun siyosiy vaziyatni beqarorlashtirishga, ichki tartibsizliklarni keltirib chiqarishga urinmoqdalar. Ammo bu ham muvaffaqiyatsiz tugamoqda», — dedi Putin.

Rossiya rahbari mazkur bayonotni Moskvada o‘tayotgan «Yagona Rossiya» partiyasining XXIII qurultoyi yalpi majlisida so‘zlagan nutqi davomida bildirdi.