Fransiya terma jamoasi yulduzi Ispaniyaga ko‘chib o‘tmoqchi

Myunxenning «Bavariya» klubi vingeri Maykl Olise kelajakda faoliyatini Ispaniya chempionatida davom ettirishni istamoqda. Fransiyalik futbolchiga asosiy da’vogarlardan biri Madridning «Real» klubi hisoblanadi.

Bu haqda CF Bayern Insider jurnalisti Kristian Falk ma’lum qildi.

Manbaning ta’kidlashicha, «Bavariya» rahbariyati 24 yoshli futbolchi bilan yangi, moliyaviy jihatdan yaxshilangan shartnoma imzolash ishlarini jadallashtirmoqchi.

Biroq «Real» kabi Yevropaning yetakchi klublari tomonidan bildirilayotgan qiziqish myunxenliklar uchun jiddiy muammoga aylanishi mumkin.

Ma’lumotlarga ko‘ra, madridliklar o‘tgan yozdayoq Oliseni sotib olish uchun katta mablag‘ sarflashga tayyor bo‘lgan. Ammo «Bavariya» rahbariyati fransiyalik futbolchini sotilmaydigan o‘yinchilar qatoriga kiritib, uning transferiga ruxsat bermagan.

Falkning qo‘shimcha qilishicha, Angliyaning «Manchester Siti» klubi ham Olise uchun jozibador variant bo‘lishi mumkin.

Ayni paytda fransiyalik vinger jahon futbolidagi eng kuchli hujumkor futbolchilardan biri sifatida baholanmoqda. Uning yuqori saviyadagi o‘yini Yevropaning bir qator grandlari e’tiborini tortayotgani aytilmoqda.

Olise joriy mavsumda «Bavariya» safida 9 ta uchrashuvda maydonga tushib, 8 ta gol urdi va 4 ta golli uzatmani amalga oshirdi.

Shu tariqa, myunxenliklar o‘z yetakchisini uzoq muddatga jamoada olib qolishga harakat qilayotgan bir paytda, «Real» uning kelajakdagi ehtimoliy manzillaridan biri bo‘lib qolmoqda.