Fors ko‘rfazi davlatlari yetakchilari Jiddada uchrashadi

​Saudiya Arabistoni bugun Jidda shahrida Fors ko‘rfazi hamkorlik kengashining favqulodda yig‘ilishini o‘tkazadi. Bu ikki oy avval mintaqa davlatlari Eron bilan urush frontiga aylanganidan beri yetakchilarning ilk yuzma-yuz muloqoti bo‘ladi. Uchrashuvdan maqsad — 28 fevraldan beri davom etayotgan va oltita davlatning energetika hamda harbiy infratuzilmasiga zarar yetkazgan minglab raketa va dron hujumlariga qarshi jamoaviy javob choralarini ishlab chiqishdir.

​Sammitda ishtirok etish uchun Qatar Amiri, Quvayt valiahd shahzodasi, Bahrayn qiroli va BAA Tashqi ishlar vaziri Jiddaga tashrif buyurishdi. 8 aprelda AQSh va Eron o‘rtasida sulh tuzilib, hujumlar kamaygan bo‘lsa-da, doimiy kelishuv yo‘qligi sababli mintaqada xavotir saqlanib qolmoqda. BAA rasmiylari esa Kengashning urushga nisbatan pozisiyasini tarixdagi eng zaif deb atab, a’zo davlatlarning harbiy va siyosiy reaksiyasi yetarli emasligini ta’kidladi.