Fidan: "Qora dengizdagi kemalarga qilingan hujumlar urush geografiyasining kengayganidan darak beradi"

Qora dengizdagi kemalarga hujumlar harbiy amaliyotlar kengayganidan dalolat beradi, bu Turkiyaning ilgari bildirilgan xavotirlarini tasdiqlaydi.

Bu haqda Turkiya tashqi ishlar vaziri Xoqon Fidan Bryusselda jurnalistlarga bergan intervyusida ma’lum qildi.

Uning ta’kidlashicha, Kairos va Virat tankerlariga qilingan hujumlar Qora dengiz yo‘nalishi bo‘ylab yuk tashishda muammolar tug‘dirmoqda va umuman dengiz savdosiga tahdid solmoqda.

"Qora dengizning eng uzun qirg‘oq chizig‘iga ega bo‘lgan davlat sifatida tegishli choralarni ko‘rishimiz kerak edi. Biz bu boradagi mas’uliyatimizni bajarmoqdamiz" dedi Fidan.

Vazir, shuningdek, Turkiya, Bolgariya va Ruminiya bilan qirg‘oq chizig‘ini, ayniqsa minalardan himoya qilish uchun ishchi guruh tuzilganini ta’kidladi.