2026 yilda oylik, stipendiya, pensiya va nafaqalar oshiriladi

Iqtisodiyot va moliya vazirligi 2026 yil uchun davlat byudjetiga doir qonun loyihasini e’lon qildi. Hujjatda qator iqtisodiy ko‘rsatkichlar o‘rin olgan.

Qonun loyihasida kelasi yili davlat xodimlari ish haqi, pensiya, stipendiya va nafaqalar miqdorini oshirishga byudjetdan 6 trln so‘m ajratilishi belgilangan. Bunga ayrim xizmat turlari narxi ko‘tarilishi va qo‘shimcha ish o‘rinlari yaratilishi xarajatlari ham kiradi.

Kelasi yillarda aholi real daromadlarini ko‘tarish uchun davlat xodimlarining ish haqi, pensiya va nafaqalarni yillik inflyasiyadan yuqori oshirib borish reja qilingan. Prognozlarga qaraganda, 2026-yilda O‘zbekistonda inflyasiya darajasi 7 foiz atrofida shakllanishi kutilmoqda.

Vazirlik mamlakatda davlat xodimlari ish haqi 1 foiz oshirilsa, byudjetdan qo‘shimcha 1 trln 697 mlrd so‘m ajratilishi kerakligini bildirdi. Pensiya 1 foiz ko‘tarilsa, ortiqcha 832 mlrd so‘m xarajat qilinishi zarur.

Byudjet xarajatlarining katta qismini ish haqiga to‘lovlar tashkil etadi. Masalan, 2026-yilda ish haqi va ijtimoiy soliq xarajatlari uchun davlat 172,8 trln so‘m ajratmoqchi. Bu 2025-yilgi tasdiqlangan rejaga nisbatan 18,5 trln so‘mga ko‘p. Kelasi yilda oyliklarga to‘lovlar davlat byudjeti xarajatlarining 42,9 foizini tashkil etishi kutilyapti. Mazkur chiqimlar yalpi ichki mahsulotga nisbatan 8,7 foizni tashkil etishi prognoz qilinmoqda. Shu bilan birga, 2026-yilda stipendiyalarga 2,2 trln so‘m to‘lanadi. Pensiya to‘lovlariga 86,1 trln so‘m, nafaqalarga 14 trln so‘mdan ortiq mablag‘ ajratilishi kutilmoqda.