Eyfel minorasi diniy guruh tashrifi ortidan vaqtincha faoliyatini to‘xtatdi

Parijdagi Eyfel minorasiga tashrif buyurgan diniy tashkilot bilan bog‘liq delegasiya a’zolarining talabi mojaroga sabab bo‘ldi. Tashrif davomida ayol xodimlardan ish joylarini tark etish so‘ralgani aytilmoqda.

Reuters ma’lumotiga ko‘ra, shanba kuni Eyfel minorasiga hindu tashkiloti bilan bog‘liq qariyb 100 nafar kishidan iborat guruh tashrif buyurgan. Delegasiya o‘tishi vaqtida ayol xodimlardan ish joylarini bo‘shatish va ularning o‘rniga erkak xodimlarni qo‘yish so‘ralgan.

Kasaba uyushmasi vakili Diana Dovuenning aytishicha, xodimlardan bunday talab qo‘yilgani norozilikka sabab bo‘lgan.

Eyfel minorasini boshqaruvchi SETE kompaniyasi delegasiya tashrifni ayollar bilan aloqani imkon qadar kamaytirish sharti asosida tashkil etishni so‘raganini tasdiqladi.

Kompaniyaning bildirishicha, bunday shartlarga rozi bo‘lish kerak emas edi. SETE bu talablar tashkilotning qadriyatlari hamda erkaklar va ayollar o‘rtasidagi tenglik tamoyillariga mos kelmasligini ta’kidladi.

Shundan so‘ng, dushanba kuni Eyfel minorasi tashrif buyuruvchilar uchun yopildi. Ob’ektning vaqtincha yopilishi ushbu holat yuzasidan yuzaga kelgan vaziyat bilan bog‘liq ekani xabar qilindi.

Hodisa Fransiyada jamoat joylarida gender tengligi va diniy e’tiqod bilan bog‘liq talablar o‘rtasidagi munosabatlar haqida bahslarni yana kun tartibiga olib chiqdi.