Estoniya mudofaa vaziri iste’fo berdi

Estoniya mudofaa vaziri Xanno Pevkur iste’fo berdi. U mamlakat mudofaa sohasida Milliy audit idorasi tomonidan aniqlangan muammolar uchun siyosiy javobgarlikni o‘z zimmasiga olib, iste’foga chiqishini e’lon qilgan. ​Pevkur bu haqda ERR telekanalining "Aktualna kamera" dasturida jonli efirda e’lon qildi. ​"Men bu mas’uliyatni o‘z zimmamga olishga tayyorman, men buni qabul qilaman va Bosh vazir yangi mudofaa vazirini topishi kerak", dedi Pevkur. ​Uning so‘zlariga ko‘ra, Milliy audit idorasining, xususan, Estoniya mudofaa kuchlari va Milliy mudofaa investisiya markazi faoliyatiga oid izohlari mudofaa vazirligi rahbariyatining siyosiy javobgarligi masalasini ko‘taradi. ​"Boshqacha qilib aytganda, vazir paypoq va o‘qlarni sanamasa ham yoki shartnomalar bo‘yicha muzokaralar olib bormasa ham, Milliy audit idorasining, xususan, Mudofaa kuchlari va Milliy mudofaa investisiya markazi faoliyatiga oid izohlari siyosiy javobgarlik masalasini ko‘taradi. Shuning uchun, men bugun butun mudofaa sektori uchun siyosiy javobgarlikni o‘z zimmamga olish va o‘z vaqtida mudofaa vaziri lavozimini Bosh vazirga topshirish to‘g‘ri deb hisoblayman", deb ta’kidladi Pevkur. ​Shu bilan birga, vazir o‘z lavozimida bo‘lgan paytida mamlakatning mudofaa qobiliyatini mustahkamlash bo‘yicha qabul qilingan qarorlarni to‘g‘ri deb bilishini ta’kidladi. ​"Estoniya avvalgidan ham yaxshiroq himoyalangan", dedi u. ​Pevkurning qarori mudofaa sektoridagi buxgalteriya hisobi va Ukraina uchun xaridlar bilan bog‘liq vaziyatga tanqidlar fonida qabul qilindi.