Erondagi yadroviy reaktorga zarar yetdi, radiasiya xavfi mavjud

Xalqaro atom energiyasi agentligi (MAGATE) Eronning Arak shahri yaqinida qurilayotgan yadroviy ob’ektga zarba berilganini tasdiqladi. MAGATEga ko‘ra, «ahamiyatli binolar»ga zarar yetkazilgan, deb xabar beradi VVS.

Ma’lumotlarga ko‘ra, payshanba kuni Isroil harbiy samolyotlari Arakdagi reaktorni bombardimon qilgan. MAGATE ushbu ob’ektda yadroviy material mavjud emasligini bildirgan.

Arakdagi reaktor Tehrondan 250 km janubi-g‘arbiyda joylashgan bo‘lib, ilmiy tadqiqotlar uchun mo‘ljallangan. Biroq bunday reaktorlarda plutoniy hosil bo‘lishi mumkin, u esa yadroviy qurol ishlab chiqarishda qo‘llaniladi.

MAGATE rahbari Rafael Grossi bildirishicha, Isroil zarbasi oqibatida «yirik radiologik hodisa» yuz bermagan bo‘lsa-da, «radiasiyali avariya» xavfi hanuz mavjud.

“Bu murakkab va noaniq vaziyatda MAGATE yadroviy ob’ektlar to‘g‘risida o‘z vaqtida va muntazam texnik ma’lumot olishi juda muhim”, – deyiladi agentlik bayonotida.