Eron yaqin kunlarda AQShga javob qaytaradi

Eron AQShning Tehron yadroviy dasturi atrofidagi vaziyatni hal qilish taklifiga yaqin kunlarda javob qaytaradi.

Bu haqda Islom Respublikasi Atom energiyasi tashkiloti vakili Behruz Kamolvandiy ma’lum qildi.

"AQShning yozma taklifiga Eronning javobi deyarli tayyor va yaqin kunlarda taqdim etiladi", - deya uning so‘zlaridan iqtibos keltiradi Eronning Tasnim agentligi.

1 iyun kuni Oq uy matbuot kotibi Kerolayn Livitt AQSh prezidentining elchisi Stiven Uitkoff Eron rasmiylariga Tehron yadroviy dasturi bo‘yicha “batafsil va maqbul taklif” yuborganini aytdi. Axios portalining xabar berishicha, u Eron uranni keyinroq aniqlanadigan vaqt davomida past darajaga qadar boyitishda davom etishini ko‘zda tutadi. 7 iyun kuni AQSh prezidenti Donald Tramp Eron uranni boyitmasligi kerakligini, aks holda Tehron Vashingtonning oqibatlariga duch kelishini aytdi.