Eron tashqi ishlar vaziriga nisbatan uyushtirilishi rejalashtirilgan suiqasdning oldi olindi

Eron tashqi ishlar vaziri Abbos Arag‘chiga nisbatan uyushtirilishi rejalashtirilgan suiqasdning oldi olindi.

Bu haqda TIV rahbari maslahatchisi Muhammad Husayn Ranjbaran ma’lum qildi.

Uning so‘zlariga ko‘ra, voqea bir necha kun avval Tehronda sodir bo‘lgan.

"Agar vatanning noma’lum askarlari xavfsizlik choralarini ko‘rmaganida, ehtimol, barbod bo‘lgan Isroilning yirik fitnasi amalga oshirilgan bo‘lardi", deb yozadi diplomat. Suiqasdning holatlari oshkor etilmagan.

Isroil bilan mojaro boshlanganidan keyin Abbos Arag‘chi AQSh prezidenti Donald Trampning maxsus vakili Stiv Uitkoff bilan bir necha marta bevosita telefon orqali muloqot qilgan. Boshqa narsalar qatorida, u Isroil hujumlarni to‘xtatmaguncha Tehron muzokaralarga qaytmasligini aytdi.