Eron Isroil bilan o‘t ochishni to‘xtatgach, Xitoydan raketalar xarid qildi

Eron yaqinda Isroil bilan bo‘lib o‘tgan 12 kunlik mojarodan so‘ng Xitoydan "er-havo" (SAM) turidagi raketa tizimlarini oldi.

24-iyun kuni amalda o‘t ochishni to‘xtatish kelishuviga erishilgach, Tehron o‘z havo hujumidan mudofaa tizimlarini tiklashga kirishdi. Ushbu raketa batareyalari yetkazib berilishi aynan shu sa’y-harakatlarning bir qismidir. Avvalgi Isroil hujumlari bu tizimlarga jiddiy zarar yetkazgan edi.

Ma’lumotlarga ko‘ra, Eron ushbu raketalar uchun to‘lovni neft yetkazib berish orqali amalga oshirmoqda. Bu esa Eron va Xitoy o‘rtasidagi savdo aloqalarini yanada mustahkamlab bormoqda. Xitoy hozirda Erondan eksport qilinayotgan xom neftning deyarli 90 foizini import qilmoqda. Bu neft ko‘pincha Malayziya kabi oraliq davlatlar orqali, AQSh sanksiyalarini chetlab o‘tish maqsadida yetkaziladi.

Qancha va qanday turdagi raketalar yetkazib berilgani aniq emas, biroq Eron hozirda Xitoyning HQ-9 va Rossiyaning S-300 kabi turli havo mudofaa tizimlaridan foydalanayotgani ma’lum. Shunga qaramay, bu tizimlar zamonaviy, AQSh ishlab chiqargan F-35 kabi Isroil harbiy samolyotlariga qarshi samaradorligi cheklangan deb hisoblanadi.