Evropa Ittifoqi yetakchilari Isroil hukumatini Falastin ma’muriyatiga tegishli soliq va bojxona tushumlarini muzlatish amaliyotini to‘xtatishga, G‘arbiy sohil hamda Sharqiy Quddusdagi keskinlikni kamaytirishga va harbiy amaliyotlarni darhol to‘xtatishga chaqirdi.
Bryusselda bo‘lib o‘tgan Yevropa Ittifoqi sammiti yakunlari bo‘yicha qabul qilingan bayonotda ittifoq yetakchilari G‘azo sektorida otishmalarni to‘xtatish bo‘yicha erishilgan kelishuvdan mamnun ekanliklarini bildirishdi hamda bu jarayonga hissa qo‘shgan barcha tomonlarga minnatdorlik izhor etdilar.
EI rahbarlari ikki davlat yechimiga sodiqliklarini yana bir bor tasdiqlab, G‘azoga insonparvarlik yordamini to‘siqsiz va zudlik bilan yetkazish zarurligini ta’kidladilar. Shu bilan birga, BMT va uning agentliklari hamda gumanitar tashkilotlar mustaqil va xolis faoliyat yuritishlari kerakligi qayd etildi.
Bayonotda Yevropa Ittifoqi YEUBAM Rafah va YEUPOL COPPS kabi missiyalar doirasini kengaytirish, G‘azoni barqarorlashtirish, tiklanish va qayta qurish jarayonlariga o‘z hissasini qo‘shishga tayyor ekanligi ham ta’kidlangan.
Evropa Ittifoqi yetakchilari shuningdek, Isroilni Falastin aholisiga asosiy xizmatlarni ko‘rsatish uchun zarur bo‘lgan ushlab qolingan daromadlarni ozod qilishga, Sharqiy Quddus va G‘arbiy sohildagi keskinlikni kamaytirishga, ko‘chmanchilar tomonidan amalga oshirilayotgan zo‘ravonliklarga va noqonuniy turar-joy qurilishlariga chek qo‘yishga chaqirdilar.
