UYEFA prezidenti Aleksander Cheferin FIFA ixtiyorida to‘plangan katta hajmdagi zaxira mablag‘larining bir qismini milliy assosiasiyalar o‘rtasida taqsimlash g‘oyasini ilgari surdi.
Mirror nashri xabar berishicha, agar ushbu taklif amalga oshirilsa, FIFAga a’zo bo‘lgan 211 ta federasiyaning har biri qariyb 8,75 million yevrodan mablag‘ olishi mumkin.
Cheferinning fikricha, FIFA o‘z moliyaviy barqarorligini saqlab qolishi, barcha majburiyatlarini bajarishi va yetarli zaxiraga ega bo‘lishi shart. Biroq u tashkilot hisoblarida ehtiyojdan ancha yuqori miqdorda mablag‘ jamlanganini ta’kidlagan.
"FIFAning moliyaviy jihatdan mustahkam bo‘lib qolishi juda muhim. Shu bilan birga, uning zaxiralarida milliardlab dollar mablag‘ bor. Bu pullar futbolniki va ular 211 ta a’zo assosiasiya hamda o‘yinning rivoji uchun ishlatilishi kerak", — deyiladi UYEFA rahbari bayonotida.
Cheferinning qo‘shimcha qilishicha, FIFAning kelgusi xarajatlari uchun zarur bo‘lgan summadan ortiqcha qismi milliy federasiyalarni qo‘llab-quvvatlash va futbol infratuzilmasini rivojlantirishga sarflanishi mumkin.
Avvalroq Janni Infantino FIFA Forward Enterprise nomli yangi tuzilma tashkil etishni rejalashtirayotgani haqida ma’lumotlar tarqalgan edi. Rejaga ko‘ra, ushbu kompaniya FIFAning erkaklar va ayollar o‘rtasidagi yirik musobaqalari bilan bog‘liq jarayonlarni boshqarishi kerak edi.
FIFA mazkur loyiha orqali 4,2 milliard dollargacha investisiya jalb qilish imkoniyati borligini bildirgan. Biroq tashabbus futbol olamida bir qator e’tirozlarga ham sabab bo‘lgan.
56 yoshli Janni Infantino 2016 yildan beri FIFA prezidenti lavozimida faoliyat olib bormoqda. U keyinchalik muqobil nomzodlarsiz yana ikki marta tashkilot rahbari etib saylangan.
L’Equipe 2026 yilgi "Oltin to‘p" uchun asosiy 5 da’vogarni ma’lum qildi
Husanovga juda yuqori ball berishdi
Eronlik milliarder "Chelsi" futbol klubini sotib oldi
