Braziliya prezidenti Trampga internetda kamroq vaqt o‘tkazishni maslahat berdi

AQSh prezidenti Donald Tramp internet va ijtimoiy tarmoqlarda vaqt o‘tkazish o‘rniga davlat rahbari sifatida o‘z vakolatlarini amalga oshirishga e’tibor qaratishi kerak.

Bunday fikrni Braziliya yetakchisi Luis Inasiu Lula da Silva bildirgan.

"AQShdek yirik davlatning prezidenti bor ekan, bu notinch dunyoda u nima deyishi haqida o‘ylashi, internetda kamroq vaqt o‘tkazishi va davlat rahbari sifatidagi mas’uliyatini bajarishga ko‘proq vaqt ajratishi kerak", — dedi u.

Braziliya prezidentining fikricha, Tramp erkin savdoni rivojlantirish, ko‘p tomonlama munosabatlarni mustahkamlash va tinchlikka erishish haqida ham ko‘proq o‘ylashi kerak.