"Bola ortidan bola..." G‘azoda shifokorlar tanlov oldida: kimni qutqarish va kimni yo‘qotish kerak?

"Ommaviy qirg‘inning miqyosini tasavvur qila olmayman" - G‘azo shifokori.

Isroil bombardimonni qayta boshlaganidan so‘ng yuzlab yarador keltirilgan G‘azoning Nosir shifoxonasidagi tibbiyot xodimlari cheklangan imkoniyatlar bilan ko‘plab jabrlanganlarga yordam ko‘rsatishga qiynalayotganlarini aytmoqda. Bu esa ularni kimni birinchi navbatda davolash haqida og‘ir qarorlar qabul qilishga majbur qilmoqda.

Tashrif buyurgan britaniyalik jarroh Sakib Rokadiya: "Bola ortidan bola, yosh bemor ortidan yosh bemor shifoxonaga shoshilinch ravishda olib kirilardi. Ularning mutlaq ko‘pchiligi ayollar, bolalar va keksalar," dedi.

U va boshqa shifokorlar duch kelgan jarohatlar orasida miyasida bomba parchasi bo‘lgan yosh qiz, yuragida teshiklari bo‘lgan olti yoshli bola va tos suyagi majaqlangan 29 yoshli ayol bor edi.

Shifoxona hamshirasi Haj-Hassan shunday dedi: "Men kimni birinchi navbatda ko‘rishim, kimni jarrohlik xonasiga yuborishim, kimni qutqarib bo‘lmaydigan holat deb e’lon qilishim kerakligini aniqlash uchun burchakdan-burchakka yugurib, o‘zimni yo‘qotib qo‘ygandim."

"Bu juda murakkab qaror va biz uni bir necha marta qabul qilishga majbur bo‘ldik. Men bu yerda ko‘rib turgan, uyqudagi oilalarning ommaviy qirg‘in qilinishi va qatl etilishi miqyosini tasavvur qila olmayman va anglab yetolmayman. Bu biz yashayotgan dunyo bo‘lishi mumkin emas."