Belgiya: AQShning falastinlik rasmiylar vizasini bekor qilishi “diplomatiyaga zarba”

Belgiya tashqi ishlar vaziri Maksim Prevost AQShning Falastin rasmiylariga berilgan vizalarni bekor qilish qarorini keskin tanqid qildi. Uning so‘zlariga ko‘ra, ushbu qaror “juda afsuslanarli” va “diplomatiyaga zarba” hisoblanadi.

Prevostning ta’kidlashicha, BMT Bosh Assambleyasining 80-sessiyasi arafasida falastinlik vakillarni chetlatish nafaqat adolatsizlik, balki ko‘p tomonlama hamkorlik va xalqaro huquq tamoyillariga ziddir.

“Falastin ovozini o‘chirish teskari natija beradi. BMT barcha xalqlar, ayniqsa, kelajagi muloqotga bog‘liq bo‘lganlar ovozi eshitiladigan minbar bo‘lib qolishi shart”, — dedi vazir.

AQSh Davlat departamenti esa vizalarning bekor qilinishiga izoh berib, Falastin ma’muriyatini terrorizmni qoralamaslikda, zo‘ravonlikka undashda va Xalqaro sudlar orqali Isroilga qarshi “huquqiy urush” olib borishda aybladi.

Shu bilan birga, Fransiya, Buyuk Britaniya, Kanada va Avstraliya kabi bir qator davlatlar BMT Bosh Assambleyasida Falastin davlatini rasman tan olish rejalarini e’lon qilgan.