«Barselona» – «Xetafe» o‘yinida Falastin bayrog‘ini ko‘targan muxlis maydonga tushdi (foto)

"Barselona"ning "Xetafe"ga qarshi o‘yinida Falastin bayrog‘ini ko‘targan muxlis maydonga yugurib chiqdi.

La Liganing 5-turida kataloniyaliklar 3:0 hisobida g‘alaba qozondi.

62-daqiqada Dani Olmo "Barselona"ning 3-golini urgan vaqtda "Estadi Johan Cruyff" maydoniga Falastin bayrog‘ini ko‘targan muxlis yugurib chiqdi. Muxlis xavfsizlik xizmati xodimlari tomonidan qo‘lga olingan.

Voqeadan so‘ng, "Xetafe" murabbiylar shtabi Olmoning golini bekor qilishni talab qildi, ammo hakam Rikardo Bengoechea baribir golni hisobga oldi va yugurib ketgan muxlis o‘yinga ta’sir qilmadi deb hisobladi. Hakam bilan tortishuvdan so‘ng "Xetafe" bosh murabbiyi yordamchisi Patrisio Moreno qizil kartochka oldi.