Bag‘oiy: Amerika xalqining haqiqiy dushmani — uning urushqoq hukmdorlari

Eron Tashqi ishlar vazirligi vakili Ismoil Bag‘oiy Amerika xalqining asosiy tahdidi mamlakat tashqarisida emas, balki AQShning urushqoq siyosiy elitasi ichida ekanini bildirdi. Bu haqda «Tasnim» agentligi xabar berdi.

Bag‘oiy ijtimoiy tarmoqdagi sahifasida AQSh prezidentining Los-Anjeles va San-Diyego shaharlariga Eron tomonidan ehtimoliy hujum qilinishi haqidagi da’volariga munosabat bildirdi.

«Hukmdorlar o‘z xalqini qo‘rqitish uchun osmonda xayoliy dushman obrazini yaratadi va e’tiborni yerdagi haqiqiy tahdiddan chalg‘itishga urinadi», — deb yozdi u.

Eronlik diplomatning ta’kidlashicha, asosiy xavf AQSh chegaralaridan tashqarida yoki Los-Anjeles va San-Diyego osmonida emas, balki global oqibatlarga olib keladigan noqonuniy urushlarni boshlayotgan siyosiy elita faoliyatidadir.

Bag‘oiy AQSh prezidentining shaharlarning vayron bo‘lishi «juda arzon to‘lov» bo‘lishi mumkinligi haqidagi gaplarini ham tanqid qildi. U buni aholini mavjud bo‘lmagan tahdid bilan qo‘rqitish va haqiqiy xavflardan chalg‘itishga qaratilgan «qo‘rquv siyosati» deb atadi.