Avstriyalik nonvoyxona Nyu-Yorkda 60 dollarlik non sotmoqda

Avstriyaning Martin Auer nonvoyxonalar tarmog‘i mamlakatdan tashqaridagi ilk filialini Nyu-Yorkda ochdi. Bu yerda 1,5 kilogrammlik javdar noni 60 dollar, ya’ni 51 yevro narxda sotilmoqda. Rye by Martin Auer do‘koni Manhettenning Soxo tumanida joylashgan.

Non organik Avstriya g‘allasidan tayyorlanadi va xamirturush asosida pishiriladi. Xamir 24 soatgacha fermentasiya qilinadi. Do‘kon assortimentida asosiy e’tibor aynan shu nonga qaratilgan: u butun, yarim va chorak bo‘laklarda sotiladi, shuningdek, sendvichlar tayyorlashda ham ishlatiladi.

Avstriyada xuddi shunday nonning narxi 10 yevrodan kam. Nyu-Yorkdagi 60 dollarlik narx bahslarga sabab bo‘lganiga qaramay, do‘kon oldida xaridorlar navbatga tizilmoqda.

Soxodagi yangi nuqta Martin Auer tarmog‘ining 43-do‘koni va xorijdagi birinchi filiali bo‘ldi. Kompaniya yuqori narxni qimmat ijara joyi hamda non tayyorlash jarayonining mehnattalab ekani bilan izohlamoqda.