Asadning pullari: Suriyada qancha, qanday ishlab topilgan va hozir qayerda?

Suriyaning hokimiyatdan ag‘darilgan diktatori Bashar al-Assad va uning oilasining qancha puli borligini hech kim bilmaydi. Eng to‘g‘ri va ehtimol faktlarga asoslangan hisob AQSh Davlat departamenti tomonidan 2022 yilda Kongressga taqdim etilgan hisobotda berilgan – Asad va uning rafiqasi Asmaning shaxsiy boyligi 2 milliard dollarga yetishi mumkin.

Asad oilasining Dubay, Moskva va Londonda ko‘chmas mulki va o‘nlab maxfiy bank hisob raqamlari borligi ko‘rsatilgan. Masalan, Britaniya OAVlari Suriyada fuqarolar urushi boshlanishi bilan Britaniya rasmiylari Asadning HSBC bankining London bo‘limidagi 40 million funt sterling bilan hisobini muzlatib qo‘ygani haqida xabar berdi.

Milliard dollarlik shaxsiy boylik Asad oilasi boyligining kichik bir qismi bo‘lishi mumkin. Boshqa, kamroq konservativ hisob-kitoblarga ko‘ra, u 200 tonna oltin va taxminan 22 milliard dollarlik aktivlarga ega. Ayrim kuzatuvchilar hatto Asadlarning boyligi, jumladan, yashirin aktivlari 122 milliard dollarga yetishi mumkinligini taxmin qilishmoqda.

Musodara qilingan hisob va mulklar haqidagi ma’lumotlar, shuningdek, Asadning qarindoshlari, masalan, amakivachchasi Rami Maxluf ishtirokidagi sud jarayonlari hokimiyatdan ag‘darilgan prezident va uning yaqinlari Suriya iqtisodidan qancha pul o‘tkazib yuborganining yana bir dalilidir.

Boyligi 5 milliard dollardan 10 milliard dollargacha baholangan Rami Maxluf Asaddan keyin Suriyadagi eng boy odam hisoblanib kelindi, to u bilan janjallashib qoldi. 2016 yilda Asadning yana bir amakivachchasi Hofiz Maxlufning bank hisobi pul yuvishda gumon qilinib, Shveysariyada muzlatilgan edi. Uning hisobida 3,2 million dollar bor edi.