Armanistonda mahbus sud binosidan qochib ketdi

Armanistonda mahbus Armavir umumiy yurisdiksiya sudi binosidan qochib ketdi.

Armaniston ommaviy axborot vositalari xabar berishicha, u «Armavir» jazoni ijro etish muassasasida jazo o‘tayotgan bo‘lgan.

Erkak oilaviy zo‘ravonlik ishi bo‘yicha ehtiyot chorasini tanlash masalasini ko‘rib chiqish uchun sudga olib kelingan. Sudya uni hibsga olish to‘g‘risidagi qarorni o‘qib eshittirganidan so‘ng, erkak qochishga muvaffaq bo‘lgan.

Ayni vaqtda Armavir shahrida polisiya kuchaytirilgan tartibda xizmat olib bormoqda.

Armaniston ichki ishlar vazirining matbuot kotibi Narek Sargsyan mahbusning qochib ketgani haqidagi ma’lumotni tasdiqlagan.

Ommaviy axborot vositalari ma’lumotlariga ko‘ra, avvalroq Shirak viloyatida ham shunga o‘xshash hodisa sodir bo‘lgan. O‘shanda ayblanuvchi sud binosining oynasini sindirib, qochib ketgan, biroq keyinchalik qo‘lga olingan. Qochib ketganidan so‘ng unga nisbatan yangi ayblovlar qo‘yilgan.