Ar-Riyodda Ukraina-AQSh muzokaralari yakunlandi

Ar-Riyodda AQSh va Ukraina vakillarining uchrashuvi yakunlandi.

Bu haqda Mudofaa vazirligi rahbari va Ukraina delegasiyasi rahbari Rustem Umerov X ijtimoiy tarmog‘ida yozdi. U muzokaralar "samarali va mazmunli" o‘tganini hamda tomonlar asosiy masalalar, jumladan, energetika masalalarini muhokama qilganini ta’kidlagan.

"Ukraina prezidenti Vladimir Zelenskiyning maqsadi - mamlakatimiz va xalqimiz uchun, kengroq aytganda, butun Yevropa uchun adolatli va mustahkam tinchlikni ta’minlash. Biz bu maqsadni amalga oshirish uchun harakat qilyapmiz", - deya xulosa qildi Umerov.

Qayd etish joizki, muzokaralarda Mudofaa vazirligi rahbaridan tashqari prezident devoni rahbari o‘rinbosari Pavel Palisa ham ishtirok etgan. Amerika delegasiyasi tarkibiga Davlat departamentining siyosatni rejalashtirish bo‘yicha direktori Maykl Anton, shuningdek, Ukraina bo‘yicha maxsus elchi yordamchilari Keyt Kellog va Milliy xavfsizlik bo‘yicha maslahatchi Mayk Uolts kirdi.