AQSh Xitoydan robototexnika importlariga milliy xavfsizlik nuqtai nazaridan yangi cheklovlar joriy etishni rejalashtirmoqda

AQSh Savdo vazirligi hozirda Xitoy hukumati tomonidan subsidiyalanadigan robot ishlab chiqaruvchilar mahsulotlarini tahlil qilmoqda. Vashingtonning fikricha, davlat tomonidan qo‘llab-quvvatlanayotgan xitoylik kompaniyalar jahon bozorlarini tez egallab, amerikalik ishlab chiqaruvchilar raqobatga to‘liq tayyor bo‘lishidan oldin ustunlikka erishishi mumkin. Shu sababli robototexnika sohasi milliy xavfsizlik uchun muhim yo‘nalish sifatida baholanmoqda.

Manbalarga ko‘ra, AQSh ma’muriyati robototexnikani sun’iy intellekt chiplaridan keyin Xitoy bilan texnologik raqobatning yangi fronti deb hisoblamoqda. Savdo vaziri Govard Latnik SpaceX, Boston Dynamics, Siemens, Rockwell Automation, JPMorgan Chase va Goldman Sachs vakillari bilan uchrashuv o‘tkazgan. Uchrashuvda robotlashtirilgan qurollar davri yaqinlashayotgani va AQSh bu sohada ustunlikni boy bermasligi kerakligi ta’kidlangan.