AQSh va Eron 60 kunlik sulhga va Hormuz bo‘g‘ozini to‘liq ochishga kelishib oldi

AQSh va Eron rasmiylari sulhni 60 kunga uzaytirish va Eronning yadroviy dasturi bo‘yicha muzokaralar olib borish imkonini beruvchi o‘zaro anglashuv memorandumi loyihasiga kelishib oldi. Bu haqda Axios nashri manbalarga tayanib xabar berdi.

Hujjatning asosiy qoidalari:
- Eron Hormuz bo‘g‘ozi orqali bojlarsiz yoki hibsga olishlarsiz cheklovsiz o‘tishni ta’minlaydi;

- Eron 30 kun ichida bo‘g‘ozdan minalarni to‘liq tozalaydi va AQSh dengiz blokadasini bosqichma-bosqich bekor qiladi;

- Eron yadroviy qurol ishlab chiqarishni amalga oshirmaslikka va’da beradi;

- AQSh muzokaralar doirasida sanksiyalarni yengillashtirish va muzlatilgan Eron aktivlarini ozod qilishni muhokama qilishga va’da beradi;

Muzokaralardagi birinchi masala Eronning yuqori darajada boyitilgan uranini yo‘q qilish bo‘ladi.

Axios manbalariga ko‘ra, kelishuv shartlari 26 may, seshanba kuni kelishib olingan. Biroq, ikkala tomon ham AQSh va Eron rahbarlaridan tasdiqlashni talab qilgan. Eron muzokarachilari keyinchalik kerakli tasdiqlarni olganliklarini va memorandumni imzolashga tayyor ekanliklarini e’lon qilishdi. Eron buni rasman e’lon qilmadi.

O‘z navbatida, AQSh muzokarachilari Prezident Donald Trampga kelishuv loyihasini taqdim etishdi, ammo u hali uni tasdiqlamadi. "Prezident vositachilarga bu haqda o‘ylab ko‘rish uchun bir necha kun kerakligini aytdi", dedi manbalaridan biri Axios nashriga.

Tasnim manbaga tayanib, G‘arb ommaviy axborot vositalarining AQSh va Eron o‘rtasidagi o‘zaro anglashuv memorandumi matni bo‘yicha kelishib olgani haqidagi xabarlari yolg‘on ekanligini yozadi. Manbaga ko‘ra, matn ustida ishlar hali yakunlanmagan.

"Ba’zi G‘arb manbalariga ko‘ra, Eron va AQSh o‘rtasidagi "o‘zaro anglashuv memorandumi" deb nomlangan matn allaqachon tayyor va nashr etilishini kutmoqda. Bu haqiqat emas; matn hali tugallanmagan", dedi agentlik manbasi.

Uning qo‘shimcha qilishicha, Eron hali Pokiston vakillariga hujjat ustida ishlar tugaganligi haqida xabar bermagan. "Agar matn haqiqatan ham tayyor bo‘lganida, Eron bu haqda Pokiston va boshqalarni xabardor qilgan bo‘lar edi. Ungacha G‘arb ommaviy axborot vositalarining xabarlari ahamiyasiz", deb xabar beradi Tasnim.