AQSh Kongressiga barcha turdagi Rossiya neft mahsulotlarini sotib olishni taqiqlashga qaratilgan ikki partiyaviy qonun loyihasi kiritiladi

Bu haqda Pensilvaniya shtatidan saylangan respublikachi kongressmen Brayan Fitspatrik e’lon qildi. Fitspatrikning X ijtimoiy tarmog‘ida ma’lum qilishicha, qonun loyihasi Ronald Reyganning “kuch orqali tinchlik” qonuni deb nomlanadi.

Hujjatni Vakillar palatasining yalpi majlisida ko‘rib chiqishga olib chiqish uchun parlamentdagi maxsus tartibdan foydalanish rejalashtirilgan. Ushbu mexanizm qonun loyihasini tegishli qo‘mita yoki palata spikeri ko‘rib chiqishni to‘xtatib turgan taqdirda ham, kamida 218 nafar kongressmenning imzosi bilan umumiy ovoz berishga olib chiqish imkonini beradi.

Fitspatrik qonun loyihasi katta ustunlik bilan qabul qilinishiga ishonch bildirgan. Nebraska shtatidan saylangan respublikachi kongressmen Don Beykon ham hujjatni qo‘llab-quvvatlashini ma’lum qildi. U AQSh prezidenti Donald Trampning Rossiyadan dizel yoqilg‘isi sotib olish haqidagi qarorini tanqid qildi.

Avvalroq AQSh prezidenti Donald Tramp Rossiya rahbari Vladimir Putin bilan telefon muloqotini “juda muvaffaqiyatli” deb atagan edi. Uning ma’lum qilishicha, tomonlar Rossiya dizel yonilg‘isini Qo‘shma Shtatlar va jahon bozoriga yetkazib berish bo‘yicha kelishuvga erishgan.