AQSH–Eron muzokaralari 12 aprelgacha davom etishi mumkin

Tasnimning xabar berishicha, Islomobodda o‘tayotgan AQSh va Eron delegasiyalari o‘rtasidagi muzokaralar 12 aprelgacha davom etishi mumkin.

Ma’lumotlarga ko‘ra, bugungi uchrashuv Moskva vaqti bilan soat 15:00 atrofida boshlangan va hozircha rasman yakunlanmagan.

Agentlik ta’kidlashicha, muzokaralar umumiy muhokamalardan chiqib, ayrim yo‘nalishlar bo‘yicha texnik bosqichga o‘tgan.

Uchrashuv kun tartibiga quyidagi masalalar kiritilgan:
— xorijiy banklardagi Eron hisoblarini muzlatishni bekor qilish
— Livan janubidagi Isroil hujumlarini to‘xtatish
— Hormuz bo‘g‘ozini ochish

Amerika delegasiyasi tarkibiga Jey Di Vens, Stiv Uitkoff va Jared Kushner kirgan.

Eron tomonidan esa Muhammad Bog‘ayer G‘olibaf hamda Abbos Aroqchi ishtirok etmoqda.

Ma’lum qilinishicha, 8 apreldan buyon AQSh va Eron o‘rtasida ikki haftalik sulh amal qilmoqda. Agar Islomoboddagi muzokaralar muvaffaqiyatsiz tugasa, Donald Tramp mintaqada harbiy harakatlarni qayta boshlashini bildirgan.