AQSh bunkerlarga qarshi yangi yadroviy qurolni ishlab chiqmoqda — The War Zone

Nashrning manbalariga tayanib xabar berishicha, AQSh Energetika vazirligi yadro kallagiga ega yangi kuchli bunkerga qarshi bombani ishlab chiqish uchun kelgusi moliya yili byudjetiga millionlab dollar kiritishni so‘ramoqda.

Gap samolyot orqali yetkaziladigan Nuclear Deterrent System-Air-delivered (NDS-A) nomli aviasion yadroviy o‘q-dori loyihasi haqida ketmoqda. Bunday bombalar qo‘mondonlik punktlari, omborlar, shaxta majmualari va qalin tuproq yoki beton qatlami bilan himoyalangan boshqa ob’ektlarga zarba berish uchun mo‘ljallangan.

"NDS-A Qo‘shma Shtatlarga zarba berish qiyin bo‘lgan va yerostida chuqur joylashgan nishonlarni yo‘q qilish uchun qo‘shimcha yadroviy imkoniyatlar yaratadi. Bu esa dushmanlar o‘zlarining qimmatli aktivlarini AQSh yadroviy kuchlari qo‘li yetmaydigan joyga yashira olmasligini kafolatlaydi", — dedi AQSh Milliy yadroviy xavfsizlik boshqarmasi (NNSA) vakili.

Yadro quroli sohasidagi istiqbolli ishlanmalar dasturi uchun byudjet so‘rovida 99,8 million dollar ko‘zda tutilgan. The War Zone ma’lumotlariga ko‘ra, NDS-A avvalgi B61-7 asosida yaratiladi va portlashdan oldin yerga kirib borishga imkon beruvchi mustahkamlangan korpusga ega B61-11 ning o‘rnini bosishi mumkin.

B61 — AQSh strategik kuchlarining asosiy yadroviy quroli hisoblangan termoyadroviy aviabombadir. U 1960—yillarda ishlab chiqilgan o‘q-dori asosida yaratilgan.