Peruliklar Rossiyaga oshpaz va haydovchi sifatida ishga chaqirilgan, biroq...

Biroq ularning pasportlari olib qo‘yilib, urushga yuborilgan, deyiladi bayonotda

Peru prokuraturasi ushbu mamlakat fuqarolarining qarindoshlari Rossiyaga aldov yo‘li bilan jalb qilinib, Ukrainaga qarshi urushga jo‘natilgani haqidagi murojaatlaridan so‘ng dastlabki tergovni boshladi. Bu bayonot 1 may kuni, aprel oyi oxirida Peru ommaviy axborot vositalarida shunday vaziyatga tushib qolgan yuzlab fuqarolar haqida maqolalar e’lon qilinganidan keyin berildi. Tergovni odam savdosi sohasidagi jinoyatlarga ixtisoslashgan bo‘linma olib bormoqda.

Qarindoshlarining so‘zlariga ko‘ra, peruliklarni yuqori maoshli ish va’da qilib Rossiyaga jalb qilishgan. Ular kelganlaridan so‘ng harbiy xizmat haqidagi shartnomaga qo‘l qo‘yishga majburlangan, harbiy tayyorgarlikdan o‘tkazilib, so‘ngra frontga yuborilgan.

Yuristlarning ta’kidlashicha, kamida 13 kishi halok bo‘lgan, ko‘plab odamlar bilan esa qarindoshlari boshqa bog‘lana olmayapti. Bu kabi holatlar yuzlab bo‘lishi mumkinligi aytilmoqda.

Peru poytaxtida oilalar norozilik aksiyalari o‘tkazishmoqda. Shu bilan birga, Rossiyaning Limadagi elchixonasi "chet elliklarning Moskva suverenitetini himoya qilish haqidagi qarorini chuqur hurmat qilishi" haqida bayonot berdi.